309. "മാവോ വാദികൾ" ആർക്കെതിരെയാണ് "സായുധ വിപ്ളവം" നടത്തുക?

   309. ജനാധിപത്യത്തിൽ "മാവോ വാദികൾ" ആർക്കെതിരെയാണ് "സായുധ വിപ്ളവം" നടത്തുക?

..........ഇന്ത്യയിൽ നിലനിൽക്കുന്ന ജനാധിപത്യം അംഗീകരിക്കാതെ "സായുധ വിപ്ളവം" നടത്തി മാത്റമേ അധികാരത്തിൽ എത്തുകയുള്ളൂ എന്ന രാഷ്‌ട്രീയ നിലപാട് സ്വീകരിക്കുന്ന "മാവോ" വാദികൾ ആർക്കെതിരെയാണ് പോരാട്ടം നടത്തുക? ഒരോ അഞ്ചു വർഷ ഇടവേളകളിലും ഇൻഡ്യൻ പാര്ലമെന്റിലേയ്ക്കും അസംബ്ളികളിലേയ്ക്കും നടത്തുന്ന തെരെഞ്ഞെടുപ്പുകളിലൂടെ ആരാണ് അവരെ ഭരിക്കേണ്ടത് എന്ന് തീരുമാനിക്കുന്നത് ജനങ്ങളാണ്. അങ്ങനെ നടത്തുന്ന തെരഞ്ഞെടുപ്പുകളിൽ മത്സരിക്കാനും വിജയിക്കാനും മാവോ വാദികൾ ഉൾപ്പെടെ എല്ലാവർക്കും അവകാശവും കടമയും ഉണ്ട്. എന്നാൽ അങ്ങനെയുള്ള തെരെഞ്ഞെടുപ്പുകളിൽ ഒന്നും പങ്കെടുക്കാതെ ജനങ്ങൾക്കുള്ള പരമാധികാരത്തെ വെല്ലുവിളിക്കാനാണ്‌ മാവോ വാദികൾ ശ്റമിക്കുന്നത്‌.

..........രാഷ്ട്റപതി ഉൾപ്പെടെ തെരെഞ്ഞെടുക്കപ്പെടുന്നവരുടെ കാലാവധി കൃത്യമായും നിശ്ചയിക്കപ്പെട്ടിട്ടുള്ളതാണ്. അങ്ങനെയുള്ള കാലാവധി കഴിയുമ്പോൾ വീണ്ടും തെരെഞ്ഞെടുക്കപ്പെടുന്നില്ലെങ്കിൽ പിന്നെ അവർ അധികാരത്തിൽ ഉണ്ടാവുകയില്ല. ആരും അവർക്കെതിരെ ആയുധം എടുക്കേണ്ടതില്ല.

..........ഭരണ കൂടത്തിന്റെ ഭാഗമായി പ്റവർത്തിക്കുന്ന ഉദ്യോഗസ്ഥ വിഭാഗത്തിൽ പെടുന്നവർ ആരും തന്നെ "പരമാധികാര" മുള്ളവർ അല്ല. ജനങ്ങളാൽ തെരഞ്ഞെടുക്കപ്പെടുന്ന ഭരണ കൂടത്തിനോടും ഭരണ ഘടനയോടും ആണ് അവർ ഉത്തരവാദപ്പെട്ടിട്ടുള്ളത്. അവരാകട്ടെ നിശ്ചിത പ്റായ പരിധിയിൽ മാത്റമേ പ്രവർത്തിക്കാൻ ആവുകയുള്ളൂ.

..........ഉപജീവനത്തിനായി സർക്കാർ സർവീസിൽ സംവരണ മാനദണ്ഡങ്ങൾക്ക് വിധേയമായി പ്റവേശിക്കുന്ന പാവപെട്ട ചെറുപ്പക്കാരെയാണ് മാവോ വാദികൾ വേട്ടയാടുന്നത്. അവരിൽ പലരും അവരുടെ തന്നെ വീടുകളിൽ നിന്നും വരുന്നവരും ആയിരിക്കും.
..........ജനങ്ങളുടെ ജീവിതം തടസപെടുത്തുന്ന സാമൂഹ്യ വിരുദ്ധ പ്രവർത്തനങ്ങൾ ആരുടെ ഭാഗത്തുനിന്ന് ഉണ്ടായാലും അവയെ മറികടക്കുക തന്നെ വേണ്ടി വരും. അതിനാവശ്യമായ നടപടികൾ സ്വീകരിക്കേണ്ടത് ഭരണകൂടത്തിന്റെ ചുമതലയാണ്.

.........കമ്മ്യൂണിസ്റ്റ് --സോഷ്യലിസ്‌റ്റ് ആശയങ്ങൾ ഇന്ന് ജനങ്ങളിൽ എത്തിക്കുന്നതിന് യാതൊരുവിധ തടസങ്ങളും ഇല്ല. "മാർക്സിസം" എന്ന സാമൂഹ്യ ശാസ്ത്റം നിരവധി അക്കാഡമിക് തലങ്ങളിൽ പാഠ്യ വിഷയങ്ങൾ പോലും ആണ്. നിർഭാഗ്യ വശാൽ മാർക്സിസത്തോടും സോഷ്യലിസത്തോടും നീതി പുലർത്തേണ്ട ഇൻഡ്യയിലെ കമ്മ്യൂണിസ്റ്റു പ്റസ്ഥാനം 'മുതലാളിത്തം" പ്രോത്സാഹിപ്പിക്കുക എന്ന നിലപാടാണ് 1950 കൾക്ക് ശേഷം ഇൻഡ്യയിൽ സ്വീകരിച്ചത്. തന്മൂലം തൊഴിലാളി വർഗം ഉൾപ്പെടെയുള്ള ജനവിഭാഗങ്ങൾ പരമാവധി അകലം പാലിക്കുകയാണ്. സോഷ്യലിസം സ്ഥാപിക്കുന്നത് പഴയ സോവിയറ്റ് യൂണിയനിലേത് പോലെ തന്നെ ഇൻഡ്യയിലും വേണം എന്ന തെറ്റിധാരണയാണ് കമ്മ്യൂണിസ്റ്റു പാർട്ടിയ്ക്ക് മുതലാളിത്തം പ്രോത്സാഹിപ്പിക്കുക എന്ന നിലപാട് സ്വീകരിക്കാൻ കാരണം ആക്കിയത്.

..........മാവോ വാദികൾ ജനാധിപത്യത്തെ തന്നെ വെല്ലുവിളിക്കുന്ന നിലപാട് തിരുത്തുകയും ജനങ്ങൾക്കുവേണ്ടി അവർക്ക് എന്ത് ചെയ്യാൻ കഴിയുമെന്ന് ജനങ്ങളെ ബോധ്യപ്പെടുത്തുകയും ചെയ്യേണ്ടത് ഇന്നത്തെ കാലഘട്ടത്തിന്റെ അത്യാവശ്യമാണ്.