301. സോഷ്യലിസമാണ് ലക്ഷ്യമെങ്കിൽ;
...........സി പി ഐ (എം) ന് അതിനു കഴിയുമായിരുന്നു. മുതലാളിത്തം പ്രോത്സാഹിപ്പിക്കുക എന്ന നിലപാട് ഇല്ലായിരുന്നു എങ്കിൽ സിപിഐ(എം) ന് പൊതുമേഖലകളെ സ്വകാര്യവത്ക്കരിക്കുക എന്ന നിലപാടിനോട് ഒരു തരത്തിലും പൊരുത്തപ്പെടുവാൻ ആകുമായിരുന്നില്ല. രാജ്യം ഗുരുതരമായ സാമ്പത്തിക പ്റതിസന്ധികളിലൂടെ കടന്നു പോയി കൊണ്ടിരിക്കുമ്പോഴും രാജ്യത്തിന്റെ ഖജനാവിലേക്ക് കോടിക്കണക്കിനു രൂപ എല്ലാ വർഷവും നൽകിക്കൊണ്ടിരിക്കുന്ന പൊതു മേഖലകൾ യാതൊരു മനഃസാക്ഷിയും ഇല്ലാതെ സ്വകാര്യ മേഖലയ്ക്ക് കൈമാറുന്നതിനെ ജനങ്ങളെ അണിനിരത്തി നേരിടുമായിരുന്നു.
..........ഇപ്പോൾ പാർട്ടി സ്വീകരിച്ചിട്ടുള്ള നിലപാട് ഇന്ത്യയിലെ ഒരു കാര്യത്തിലും പാർട്ടിയ്ക്ക് ഒരു ഉത്തരവാദിത്വവും ഇല്ല എന്നതാണ്. ഏത് വിഷയത്തിലും അതാത് മേഖലകളിലുള്ളവർക്ക് വേണമെങ്കിൽ സമരം നടത്തുകയോ നടത്താതിരിക്കുകയോ ചെയ്യാം. കാർഷിക മേഖലയിലേത് അടക്കം പ്രശ്നങ്ങൾ മുതലാളിത്ത വ്യവസ്ഥയിൽ പരിഹരിക്കാൻ കഴിയുമോ എന്ന കാര്യത്തിലൊന്നും പാർട്ടിയ്ക്ക് ഉത്തരവാദിത്വങ്ങൾ ഒന്നും തന്നെയില്ല. തികച്ചും നിരുത്തരവാദിത്വ പരമായ ഈ നിലപാടാണ് പാർട്ടി നൂറു വർഷം പിന്നിടുമ്പോഴും 0.5 ശതമാനത്തിന്റെ പോലും പിന്തുണ നേടാൻ കഴിയാത്തതിന്റെ കാരണം. എന്തൊക്കെ ആയാലും മുതലാളിത്തം പ്രോത്സാഹിപ്പിക്കുക എന്ന കാര്യത്തിൽ ഒരു പുനഃപരിശോധനയ്ക്കും പാർട്ടി ഒരുക്കമല്ല.
..........അതിന്റെ ഭാഗമാണ് ഇൻഡ്യയുടെ രക്തക്കുഴലുകൾ എന്ന് പോലും വിശേഷിപ്പിക്കാവുന്ന ഇൻഡ്യൻ റെയിൽവേ ആകെ സ്വകാര്യ മേഖലയ്ക്ക് കൈ മാറുന്ന കാര്യത്തിലും സ്വീകരിച്ചിട്ടുള്ളത്. ഇതിനെ സിപിഐ(എം) ഒരു തരത്തിലും അംഗീകരിക്കുകയില്ല എന്ന് പ്റഖ്യാപിച്ചുകൊണ്ട് പറ്ക്ഷോഭത്തിന് തുനിഞ്ഞാൽ ഇൻഡ്യൻ തൊഴിലാളി വർഗം മാത്റമല്ല ഇന്ത്യൻ ജനതയാകെ സിപിഐ(എം) നോടൊപ്പം ഉണ്ടാകും. പക്ഷെ ഇപ്പോഴത്തെ "പരിപാടി" യിൽ തുടരുന്നിടത്തോളം പാർട്ടി ഒരിക്കലും അതിന് തയാറാവുകയില്ല.
..........റെയിൽവേ അടക്കമുള്ള പൊതുമേഖലകളെ സംരക്ഷിക്കുക എന്നത് അത്റ നിസാരമായ പോരാട്ടമായി കാണേണ്ടതില്ല. ഇൻഡ്യൻ മുതലാളിത്തത്തോടുള്ള; ഇന്ത്യൻ ചൂഷക വർഗങ്ങളോടുള്ള പോരാട്ടമായി അതിനെ കാണണം. ഇൻഡ്യൻ റെയിൽവേ ഒരുകാരണവശാലും ഒരു തിരജെഞ്ഞെടുപ്പിൽ ജനങ്ങളുടെ മുൻപിൽ "സ്വകാര്യവൽക്കരണം" ഒരു വിഷയമായി അവതരിപ്പിച് ജനങ്ങളുടെ ഭൂരിപക്ഷ പിന്തുണ നേടികൊണ്ടല്ലാതെ സ്വകാര്യ വത്ക്കരണം അനുവദിക്കുകയില്ല എന്ന് പ്റഖ്യാപിച് പോരാട്ടം ആരംഭിക്കണം. ആവശ്യമായ പ്റചരണങ്ങളോടെ ഒരു ദിവസം ഇൻഡ്യൻ റെയിൽവേ സ്തംഭിപ്പിക്കണം. ചുരുങ്ങിയത് മൂന്നു മാസത്തെയെങ്കിലും പ്റചരണം ഇതിനു ആവശ്യമാണ്.
..........സോഷ്യലിസ്റ്റു വ്യവസ്ഥയുടെ പ്രസക്തി ജനങ്ങളെ പഠിപ്പിക്കുക എന്നതായിരിക്കണം ഈ പ്രക്ഷോഭത്തിലൂടെ നാം നേടിയെടുക്കേണ്ട ആശയ ലക്ഷ്യം. "എന്ത് ചെയ്യണം?" എന്ന കൃതിയിൽ "സോഷ്യലിസത്തിന്റെ പ്റസക്തി ലെവ ലേശം കുറച്ചുകാണുക എന്നാൽ ബൂർഷ്വാ ആശയ ഗതിയ്ക്ക് ഇടയാക്കുക എന്നതായിരിക്കും ഫലം" എന്ന ലെനിന്റെ വാക്കുകൾ അവഗണിച്ചതിന്റെ ദുരന്തഫലം 1950 കാലം മുതൽ ഇൻഡ്യയിൽ നേരിട്ടു കൊണ്ടിരിക്കുകയാണ്. 1952 ലെ പാർലമെന്റ് തെരഞ്ഞെടുപ്പിൽ കേവലം രണ്ട് പാർലമെന്റ് അംഗങ്ങൾ മാത്റം ഉണ്ടായിരുന്ന ഹിന്ദു വർഗീയ വാദികൾ ഇൻഡ്യയുടെ ഭരണം നിർവഹിക്കുക എന്നസ്ഥിതിയിലും കമ്യൂണിസ്റ്റു പ്റസ്ഥാനം ദയനീയമായ അവസ്ഥയിലും എത്തിച്ചേർന്നു.
..........ഒരു സംസ്ഥാനത് ഒരു റെയിൽവേ സ്റ്റേഷനിൽ മാത്റം എന്ന തോതിൽ എല്ലാ സംസ്ഥാനങ്ങളിലും റെയിൽവേ സ്തംഭിപ്പിക്കണം. ഒരോ കേന്ദ്രത്തിലും അമ്പതിനായിരം ആളുകളെങ്കിലും ഉണ്ടാകണം. പങ്കെടുക്കുന്നവർ ഏത് സാഹചര്യങ്ങളെയും നേരിടുവാൻ ഒരുക്കമുള്ളവർ ആയിരിക്കണം. അറസ്റ്റും ജയിൽ വാസവും എല്ലാം നേരിടേണ്ടി വരും. ജയിലിൽ പോകുന്നവർ റെയിൽവേ സ്വകാര്യവൽക്കരണം ഉപേക്ഷിക്കാതെ ജാമ്മ്യം എടുക്കാൻ പാടില്ല എന്നുള്ളതായിരിക്കണം നിലപാട്.
.........അത് നമ്മുടെ "ലോങ്ങ് മാർച് " ആയി തന്നെ കാണണം. രാജ്യത്തിനും തൊഴിലാളി വർഗത്തിനും വേണ്ടി ജീവൻ പോലും ഉപേക്ഷിക്കാൻ തയാറുള്ളവർ ആയിരുന്നു നൂറു വർഷം പിന്നിടുന്ന നമ്മുടെ പ്റസ്ഥാനത്തിന്റെ പഴയ തലമുറ. ഇപ്പോൾ ആ കാഴ്ചപ്പാടുകൾ ഉള്ളവർ കുറവാണ്. എന്നാൽ ത്യാഗം അനുഭവിക്കാൻ തയ്യാറല്ലാതെ; കേവലം തരക്കേടില്ലാതെ ഒരു തൊഴിൽ എന്ന് മാത്റം കരുതുന്നവരെ തിരിച്ചറിയാനും ഈ പോരാട്ടത്തിന് കഴിയും.
........സോഷ്യലിസ്ററ് രാജ്യങ്ങൾ ആയിട്ടുള്ളതെല്ലാം ത്യാഗ പൂർവമായ പോരാട്ടങ്ങളിലൂടെയാണ്. ഇവിടെ സായുധ വിപ്ളവത്തിന്റെ ആവശ്യമില്ല. എന്നാൽ ജനങ്ങളെ കാര്യങ്ങൾ പഠിപ്പിക്കാനുള്ള അവസരമായി ഇങ്ങനെയുള്ള പോരാട്ടങ്ങളെ ഉപയോഗിക്കണം. ഇന്ത്യൻ തൊഴിലാളി വർഗ്ഗത്തിന്റെ മോചന പോരാട്ടമായി റെയിൽവേ യുടെയും പൊതുമേഖലകളുടെ ആകെയും സ്വകാര്യ വത്ക്കരണത്തിന് എതിരായ പോരാട്ടത്തെ മാറ്റിയെടുക്കണം.
........നിർഭാഗ്യവശാൽ ഇപ്പോഴത്തെ പാർട്ടി "പരിപാടി" യിൽ തുടരുന്നിടത്തോളം ഇപ്റകാരമുള്ള പോരാട്ടങ്ങൾ ഒന്നും ഉണ്ടാവുകയില്ല. കേവലം "സമരങ്ങൾ നടത്തുന്നു" എന്ന് വരുത്താനുള്ള പതിവ് സമരങ്ങൾ മാത്റം.
..........സോഷ്യലിസം എന്ന ലക്ഷ്യം അംഗീകരിക്കുമ്പോൾ "മാർക്സിസം" എന്ന തത്വശാസ്ത്റം തൊഴിലാളി വർഗ്ഗത്തിൽ അതിന്റെ ഭൗതിക ശക്തി കണ്ടെത്തുകയാണ് ചെയ്യുക. ഒരു ആശയം ഭൗതിക ശക്തി ആയി മാറുന്ന അവസ്ഥ. 1950 വരെ ഇൻഡ്യയിൽ ഉണ്ടായിരുന്നതും മുതലാളിത്തം പ്രോത്സാഹിപ്പിക്കുക എന്ന നിലപാട് എടുത്തപ്പോൾ ഇല്ലാതായി തീർന്ന അവസ്ഥ. സോഷ്യലിസത്തിന്റെ അഭാവത്തിൽ ആ സ്ഥാനം "ഹിന്ദുത്വത്തിന്റേ"തായ; തികച്ചും തൊഴിലാളി വർഗ വിരുദ്ധ അവസ്ഥയിൽ എത്തിച്ചേർന്നു. അതാണ് 1952 ൽ ഇന്ത്യൻ പാർലമെന്റിൽ 32 കമ്മ്യൂണിസ്റ് പാർലമെന്റ് അംഗങ്ങൾ ഉണ്ടായിരുന്നത് ഇന്നത്തെ നാമ മാത്റ അവസ്ഥയിൽ ആകുന്നതിന് ഇട വരുത്തിയത്.
............04 10 2019............
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ